- 58 -

1372. März 11.

Johannes miseracione divina Patriarcha Alexandrinus apostolice sedis in partibus Alamanie Boemie Ungarie Polonie et nonnullis alijs Nuncius et legatus Universis ad quos presentes littere perveniunt Notum facimus quod ex parte Dilecte nobis in Cristo Priorisse et conventus Monasterij sancti Johanis et spiritus sancti Ratburgensis Wrat. dioc. Ordinis sancti Dominici nobis extitit humiliter supplicatum, quod ipse tanquam simplices et religiose Domine verisimiliter formidabant sibi inferri iniurias et molestias per nonnullos potente homines in et super bonis eisdem et Monasterio suo prefato concessis et collatis seu alias aquisitis vel imposterum aquirendis, super quo pecierunt per nos sibi provideri de Remedio oportuno. Nos vero attendentes supplicacionem et peticionem predictam fore iuri et racioni consonam, Mandamus, precipimus et eciam prohibemus auctoritate apostolica qua fungimur in hac parte, in virtute sancte obediencie et sub excommunicacionis pena quam canonicis monicionibus premissis in contrafacientes ferimus in hijs scriptis, quod nullus hominum contra predictas disposiciones dictorum principum et dominorum sive ultimam voluntatem condendo seu quocumque alio titulo prefatis sanctimonialibus seu ipsorum ordini et Religioni relinquendo vel causa mortis disponendo vel eciam inter vivos, ausu temerario per se vel alium directe vel indirecte presumat facere seu violare vel quomodolibet contraire. In hoc eciam prohibemus fieri de quibuscumque bonis dicto Monasterio quovis titulo per quascumque personas imposterum conferendis seu per dictum Monasterium ex quacumque causa seu titulo aquirendis seu aquisitis. Mandantes sub premissis penis . . Archidiacono Opoliensi vel eius vices gerenti qui nunc est vel qui pro tempore fuerit, quod quocienscumque per partem dictarum sanctimonialium et priorisse dicti Monasterij requisitus fuerit pro publicacione et execucione presencium litterarum et mandatorum nostrorum, ipsa publicare et diligenter excequi procuret, alias canonicis monicionibus premissis sentencias per nos latas ipsum incurrere volumus ipso facto. Datum Wratislauie sub sigillo nostro pontificio Die undecima mensis Marcij Anno domini Millesimo cccmo lxxsecundo.

Das anhängende grosse Siegel des Legaten in rothem Wachse ist beschädigt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.